Aşgabatda “Agro-Pak Türkmenistan – 2023” halkara sergisi geçiriler
28-30-njy noýabrda Aşgabatda azyk, gaplama we oba hojalyk önümlerine bagyşlanan “Agro-Pak Türkmenistan-2023” atly halkara sergisi geçiriler. Ol Türkmenistanyň Söwda-senagat edarasy we “Sofuar” kompaniýasy tarapyndan guralýar.
Sergide Azerbaýjan, Germaniýa, Hytaý, Moldowa, Özbegistan we Türkiýe ýaly dürli ýurtlaryň kompaniýalarynyň önümleri we hyzmatlary hödürlener. Gollandiýa, Russiýa we Eýran ýaly ýurtlar özleriniň ýörite pawilýonlaryny gurar.
Gatnaşyjylar dürli gaplama görnüşleri, azyk önümleri we iýmit goşundylary, çörek önümlerini öndürmek tehnologiýasy, däne saklamak we üwemek üçin enjamlar, ýyladyşhana ekinlerini ösdürip ýetişdirmegiň aýratynlyklary, guş we maldarçylyk hojalygynyň tehnologiýalary, suwaryş ulgamlary, oba hojalyk önümleri, tohumlar hem-de dökünler bilen tanşyp bilerler.
“Sofuar” kompaniýasynyň wekili Ismail Enweroglunyň sözlerine görä, türkmen telekeçileri we daşary ýurt kompaniýalary “Agro-Pak” sergisine gatnaşmaga uly gyzyklanma bildirýärler. Bu öz gezeginde çäräniň üstünlikli boljakdygyny görkezýär.
ORIENT news
