Türkmen we rus ýokary okuw mekdepleri Magtymguly barada ylmy maslahaty geçirmegi meýilleşdirýär
Magtymguly adyndaky Türkmen döwlet uniwersitetiniň ÝUNESKO kafedrasynyň hünärmenleri W.N.Tatişew adyndaky Astrahan döwet uniwersitetiniň wekilleri bilen sanly ulgam arkaly gepleşikleri geçirdiler. Onda iki ýokary okuw mekdebiň alym mugallymlarynyň ylmy çykyşlary diňlenilip, hyzmatdaşlygy giňeltmegiň meseleleri maslahatlaşyldy. Bu barada «Нейтральный Туркменистан» gazeti habar berýär.
Uniwersitetleriň wekilleriniň çykyşlary taryhy-medeni mirasy gorap saklamaga we wagyz etmäge, Ýewraziýa giňişliginiň halklarynyň arasyndaky söwda we medeni gatnaşyklaryň taryhyna, şeýle hem türkmen hem-de rus ýokary okuw mekdepleriniň arasyndaky medeni-ynsanperwer gatnaşyklara bagyşlandy.
“Tegelek stol” maslahatynda taraplar dürli ugurlarda hyzmatdaşlygyň geljegini ara alyp maslahatlaşdylar. Şunuň bilen baglylykda, hyzmatdaşlygyň depginini ýokarlandyrmak barada özara gyzyklanmalar mälim edildi. Şeýle hem türkmen we dünýä edebiýatynyň görnükli nusgawy akyldary Magtymguly Pyragynyň ömrüne we döredijiligine degişli ylmy maslahaty guramak meseleleri maslahatlaşyldy.
Magtymguly adyndaky Türkmen döwlet uniwersitetinde ÝUNESKO-nyň “Medeni miras: geçmişden geljege” atly, W.N.Tatişew adyndaky Astrahan döwet uniwersitetinde hem “Okaýan jemgyýet we durmuş-ykdysady ösüş” atly kafedralar hereket edýär.
ORIENT news
