Türkmenistanyň Prezidenti täze çagalar we ýetginjekler merkezini gurmak boýunça halkara bäsleşigini yglan etmek barada tabşyryk berdi
Aşgabat şäherinde “Güneşli” çagalar we ýetginjekler merkezi gurlar. Onda ýaş türkmenistanlylar ukyp-başarnyklaryny artydrmak üçin täze bilimleri we hünär endiklerini öwrenerler.
Türkmenistanyň Prezidentiniň bu barada ozal beren tabşyryklaryny ýerine ýetirmek boýunça alnyp barylýan işler boýunça wise-premýer Baýmyrat Annamämmedow anna güni geçirilen Ministrler Kabinetiniň nobatdaky mejlisinde hasabat berdi.
Türkmen paýtagtynyň iň gözel ýerleriniň birinde guruljak täze toplumda çagalar üçin sport we oýun meýdançalarynyň, medeni çäreleri geçirmek üçin ýörite meýdançalaryň, amfiteatryň, ýol hereketiniň düzgünlerini öwrenmek üçin meýdançanyň we beýleki desgalaryň, şol sanda tehniki, hojalyk desgalarynyň göz öňünde tutular.
Wise-premýer täze toplumyň şekil taslamalaryny döwlet Baştutanynyň garamagyna hödürledi. Türkmenistanyň Prezidenti bu taslamany durmuşa geçirmäge jogapkärli çemeleşmegiň wajypdygyna ünsi çekip, wise-premýere döwrebap merkezi gurmak boýunça halkara bäsleşigiň netijeli geçmegini üpjün etmek boýunça birnäçe anyk tabşyryklary berdi.
ORIENT news
