Türkmenistan we Özbegistan medeni-ynsanperwer hyzmatdaşlygy ösdürer
Türkmenistanyň Prezidenti Serdar Berdimuhamedow iş sapary bilen gelen Özbegistan Respublikasynyň daşary işler ministri Bahtiýor Saidowy kabul etdi. Duşuşygyň barşynda söhbetdeşler geljekde-de ylym-bilim alyşmalaryny, konsertleri, sergileri we iki halkyň has-da ýakynlaşmagyna ýardam berýän beýleki medeni çäreleriň geçirilmegini dowam etdirmäge taýýardyklaryny tassykladylar.
"Özbegistan Respublikasy Türkmenistanyň ýakyn goňşusydyr we strategik hyzmatdaşydyr. Biz dostlukly gatnaşyklary ösdürmek bilen, hemişe asyrlaryň dowamynda emele gelen dost-doganlyk, özara düşünişmek ýörelgelerine daýanýarys" diýip, Türkmenistanyň Prezidenti aýtdy.
Taraplar iki doganlyk döwletiň Baştutanlarynyň arasynda emele gelen ynanyşmagyň hem-de özara düşünişmegiň derejesine ýokary baha berdiler. Şunuň bilen baglylykda, Türkmenistanyň Prezidentiniň Ykdysady Hyzmatdaşlyk Guramasyna gatnaşyjy döwletleriň Baştutanlarynyň 16-njy sammitine gatnaşmak üçin ýakynda Daşkent şäherine amala aşyran saparynyň çäklerinde iki döwletiň Baştutanlarynyň arasynda gepleşikler geçirilip, onda geljekki hyzmatdaşlygyň ugurlary kesgitlenildi.
Ikitaraplaýyn haryt dolanyşygynyň oňyn ösüş depginini görkezýändigi kanagatlanma bilen bellenildi. Ýangyç-energetika, ulag-logistika, oba hojalygy pudaklarynda hyzmatdaşlyk işjeň giňeldilýär. Iki ýurduň sebitleriniň arasynda gatnaşyklaryň uly kuwwatyny netijeli peýdalanmak boýunça yzygiderli işler alnyp barylýar.
Duşuşygyň ahyrynda taraplar iki ýurduň doganlyk halklaryna parahatçylyk, abadançylyk, mundan beýläk-de rowaçlyk arzuw etdiler.
ORIENT news
