Türkmenistan we Saud Arabystany Hökümetara toparynyň nobatdaky mejlisini geçirmegiň senesini ylalaşdylar
Türkmenistan we Saud Arabystany Söwda-ykdysady hyzmatdaşlyk boýunça hökümetara toparynyň indiki, 7-nji mejlisini geçirmegiň senesi barada ylalaşdylar.
Penşenbe güni sanly ulgam arkaly geçirilen iki ýurduň Hökümet agzalarynyň gatnaşmagynda geçirilen gepleşiklerde Türkmenistanyň Prezidentiniň Aýlagdaky arap döwletleriniň we Merkezi Aziýa ýurtlarynyň Baştutanlarynyň sammitine gatnaşmak üçin Saud Arabystanyna bolan iş saparynyň çäklerinde gazanylan ylalaşyklaryň ýerine ýetirilişini ara alyp maslahatlaşdylar.
Türkmenistanyň Döwlet telewideniýesiniň habar bermegine görä, Söwda-ykdysady hyzmatdaşlyk boýunça hökümetara türkmen-saud toparynyň Saud Arabystan böleginiň başlygy, Patyşalygyň maýa goýum ministri dekabr aýynda öz ýurdunyň Halkara ykdysady forumyny geçirýändigini aýtdy we oňa türkmen tarapyny hem hormatly myhman hökmünde gatnaşmaga çagyrdy. Bu ykdysady forumyň yz ýany bolsa, Söwda-ykdysady hyzmatdaşlyk boýunça hökümetara türkmen-saud toparynyň mejlisi geçiriler. Bu meselede guramaçylyk meselelerini ara alyp maslahatlaşmak üçin Saud Arabystanyň wekiliýeti ýakyn wagtda Türkmenistana geler.
Sanly ulgam arkaly geçirilen duşuşyga türkmen wekiliýetine Türkmenistanyň Ministrler Kabinetiniň Başlygynyň ýangyç-energetika toplumyna gözegçilik edýän orunbasary başlyklyk etdi. Duşuşykda Saud Arabystanynyň Ösüş gaznasy bilen hyzmatdaşlygy giňeltmegiň mümkinçilikleri hem maslahatlaşyldy.
ORIENT news
