BAE-niň energetika we infrastruktura ministri Türkmenistanyň Daşary işler ministrliginde gepleşikleri geçirdi
Türkmenistanyň Daşary işler ministri Raşid Meredow Aşgabatda saparda bolýan Birleşen Arap Emirlikleriniň energetika we infrastruktura ministri Suheýl Al-Mazrui bilen duşuşyk geçirdi.
Gepleşigiň dowamynda ikitaraplaýyn hyzmatdaşlygyň meseleleri ara alnyp maslahatlaşyldy we geljegi uly ugurlar kesgitlenildi.
Raşid Meredow, iki döwletiň ýokary ýolbaşçylygynyň derejesinde özara ynamly dialog bolup durýan türkmen-emirlik gatnaşyklarynyň çalt depginli ösüşine ünsi çekdi.
Şunuň bilen baglylykda, 2022-nji ýylyň noýabr aýyndaky Türkmenistanyň Prezidenti Serdar Berdimuhamedowyň, şeýle hem türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň şu ýylyň fewral aýynda BAE-ne eden saparlarynyň ähmiýeti hem bellendi. Bu barada Daşary işler ministrliginiň habarynda aýdylýar.
Ministrler nebit-gaz we himiýa pudaklary, elektrik energiýasy, ulag we aragatnaşyk we bank pudagyndaky hyzmatdaşlygy giňeltmek boýunça-da pikir alyşdylar.
ORIENT news
