Minskde türkmen-belarus ylmy we tehnologiki hyzmatdaşlygynyň gün tertibi ara alnyp maslahatlaşyldy
Ylym we tehnologiýa pudagyndaky hyzmatdaşlyk boýunça hökümetara belarus-türkmen toparynyň üçünji mejlisi anna güni 17-nji noýabrda, Minskde geçirildi. Mejlis Belarus Respublikasynyň Döwlet ylym we tehnologiýa komitetinde boldy.
Duşuşygyň gün tertibine iki ýurduň ylmy we tehnologiki merkezlerinde gepleşikleri güýçlendirmek meselesi girdi.
Türkmenistanyň Minskdäki ilçihanasynyň berýän habaryna görä, taraplar Belarussiýada we Türkmenistanda ylym, tehnologiýa we innowasiýa ösüşiniň häzirki ýagdaýy we geljegi barada pikir alyşdylar we döwletara derejesinde ylmy-tehniki hyzmatdaşlygyň ileri tutulýan ugurlaryny kesgitlediler.
Duşuşyga gatnaşyjylar hyzmatdaşlygyň geljegi uly temalaryny şeýle hem ylmy we maglumat alyş-çalyş mümkinçiliklerini açmaga kömek etjek beýleki çäreler boýunça bilelikdäki ylmy-tehniki, gözleg taslamalaryny guramaly diýen netijä geldiler.
Gepleşikleriň netijesinde mejlisiň Teswirnamasy ylalaşyldy we oňa gol çekildi.
Saparyň dowamynda türkmen wekiliýeti Täze materiallaryň himiýa institutyna, Belarus Respublikasynyň Milli ylymlar akademiýasynyň geofiziki gözegçilik merkezine we onuň hemişelik “Ylmyň önümçilikdäki üstünlikleri” atly sergisine şeýle hem Belarus Milli tehniki we Belarus döwlet informatika we radioelektronika uniwersitetlerine baryp gördiler. Saparyň dowamynda bu edaralaryň ýolbaşçylary bilen gepleşikler geçirildi we ikitaraplaýyn hyzmatdaşlygyň aýratyn ugurlary ara alnyp maslahatlaşyldy.
ORIENT news
