Sloweniýanyň Prezidenti diplomatik gatnaşyklaryň ýola goýulmagynyň 30 ýyllygy bilen gutlady
Sloweniýanyň Prezidenti Nataşa Pirs-Musar Türkmenistanyň Prezidenti Serdar Berdimuhamedowy iki ýurduň arasynda diplomatik gatnaşyklaryň ýola goýulmagynyň 30 ýyllygy mynasybetli gutlady. Gutlag hatynyň doly teksti Türkmenistanyň resmi metbugatynda çap edildi.
"Sloweniýanyň hem-de Türkmenistanyň halkara dialogy we umumy gymmatlyklary pugtalandyrmaga uly goşant goşýandygyny, häzirki döwrüň ählumumy wehimlerine garşy durmakda bilelikde üstünlikli hereket etmäge ukyplydygyny kanagatlanma bilen bellemek isleýärin" diýlip, hatda bellenýär.
Nataşa Pirs-Musar iki ýurduň arasyndaky netijeli hyzmatdaşlygyň dünýäde parahatçylygyň, durnuklylygyň pugtalandyrylmagyna ýardam etjekdigine ynam bildirmek bilen, türkmen kärdeşine we Türkmenistanyň ähli raýatlaryna parahatçylyk, abadançylyk, ösüş baradaky arzuwlaryny beýan etdi.
ORIENT news
