Görogly etrabynda soňky ýüz ýylda ikinji üçem bäbejikler dünýä indi
Daşoguz welaýatynyň Görogly etrabynda soňky ýüz ýylyň içinde ikinji gezek üçem doglan bäbejikler hasaba alyndy. Birbada üç çaganyň ene-atasy bolan maşgala - Şahymerdan Şammyýew we Sülgün Töräýewa doglan gyz bäbejiklerine Dünýä, Dursun we Abat atlaryny dakdylar. Bu barada "Nebit-gaz" gazeti habar berýär.
Maşgalabaşy Şahymerdan Şammyýew "Türkmennebit" döwlet konserniniň "Türkmennebitönümleri" müdirliginiň sebit bölüminde 10 ýyldan bäri sürüji bolup işleýär. Täze doglan bäbejikleriň ejesi 2010-njy ýyldan bäri ýüpek gurçuklaryny ösdürip ýetişdirmek we pagta ýygmak bilen meşgullanýar. Täze doglan çagajyklaryň "10-lyk" sanda doglandygyny, ýagny 10-njy oktýabrda 10 sagat 10 minutda dünýä inendiklerini bellemek gerek.
Gyzjagazlaryň atlary türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhedowyň we Prezident Serdar Berdimuhamedowyň alyp barýan parahatçylyk söýüjilik başlangyçlaryndan ugur alnyp dakylypdyr. Üçem doglan maşgalanyň ozal hem iki çagalarynyň bardygy, şeýlelikde bagtyýar ene-atany köp çagaly maşgala diýip atlandyrmaga esas berýär.
Neşiriň bellemegine görä, täze doglan bäbejikleriň saglyk ýagdaýy kanagatlanarly. Üçemleriň dünýä inmegini bütin oba bolup toýlamak göz öňünde tutulýar.
ORIENT news
