Türkmenistan we BAE ikitaraplaýyn hyzmatdaşlygy ara alyp maslahatlaşdy
Anna güni 10-njy noýabrda, Türkmenistanyň daşary işler ministriniň orunbasary Mähri Bäşimowa Birleşen Arap Emirlikleriniň Federal Milli geňeşiniň agzasy, “Hidaýat” zorlukly ekstremizme garşy göreşmek boýunça Halkara merkeziniň direktorlar geňeşiniň başlygy Ali Raşid Al-Nuaýminiň ýolbaşçylygyndaky wekiliýeti bilen duşuşdy.
Ara alyp maslahatlaşmalaryň dowamynda taraplar ikitaraplaýyn hyzmatdaşlygyň esasy ugurlaryny, şeýle hem türkmen-emirlikler hyzmatdaşlygynyň meýilnamalaryny seljerdiler. Ministriň orunbasary iki ýurduň arasyndaky ýokary we iň ýokary derejedäki syýasy dialogyň Türkmenistan bilen BAE-niň arasyndaky hyzmatdaşlygyň çalt ösmegine goşant goşýandygyny aýtdy.
Duşuşyga gatnaşyjylar parlamentara hyzmatdaşlygyny güýçlendirmegiň zerurlygy barada netijä geldiler we bu meselede iki ýurduň arasyndaky döredilen Parlamentara dostluk toparynyň möhüm ornuny bellediler.
Şeýle hem, söhbetdeşlik wagtynda taraplar söwda we ykdysady gatnaşyklaryň progressiw ösüşine, energetika, ulag we logistika pudaklarynda hyzmatdaşlygy çuňlaşdyrmagyň geljegine ünsi çekdiler. Şeýle hem, ekologiýa we daşky gurşawy goramak meselelerine üns çekilip, şu ýylyň dekabrynda Dubaýda BMG-niň Howanyň üýtgemegi boýunça Çarçuwaly konwensiýasynyň (COP 28) 28-nji mejlisiniň üstünlikli geçirilmegi arzuw edildi.
ORIENT news
