Türkmenistan IACA-nyň 12-nji mejlisine gatnaşdy
Ýurduň Baş prokurorynyň orunbasary tarapyndan ýolbaşçylyk edilýän Türkmenistanyň wekiliýeti penşenbe güni 9-njy noýabrda, Korrupsiýa garşy Halkara akademiýa (IACA) gatnaşyjy taraplaryň Assambleýasynyň 12-nji mejlisine gatnaşdy.
Duşuşyga başlangyja gatnaşýan ýurtlaryň we birnäçe halkara guramalarynyň wekilleri gatnaşdy. Onuň gün tertibine IACA-nyň çäreleri bilen baglanyşykly meseleler girdi:korrupsiýanyň öňüni almak çäreleri, bu ugurda dünýä ülňülerini durmuşa geçirmek we guramanyň häzirki wezipeleri. Duşuşygyň netijesinde akademiýanyň geljek ýyl üçin býudjeti kabul edildi.
Türkmenistanyň wekilleri öz çykyşlarynda döwletiň parahatçylykly durmuşa we durnukly ösüşe wehim salýan häzirki zaman päsgelçiliklerine garşy göreşiň çäginde halkara hyzmatdaşlygy pudagyna aýratyn ähmiýet berýändigini bellediler.
Türkmenistanyň BMG-niň Korrupsiýa garşy konwensiýasy ýaly birnäçe global şertnamalara işjeň gatnaşýandygyny bellemek möhümdir. Bu nukdaýnazardan yzygiderli işler alnyp barylýar we eýýäm oňyn netijeler hem gazanyldy: Korrupsiýa garşy göreşmek hakynda Türkmenistanyň kanuny, korrupsiýa garşy hereket etmek boýunça Milli maksatnama we 2020-2024-nji ýyllar üçin ony durmuşa geçirmegiň Meýilnamasy kabul edildi.
Ýakynda Türkmenistanyň Korrupsiýa garşy Halkara akademiýasyny döretmek baradaky Ylalaşyga goşulandygyny ýatlap geçeliň. Gatnaşyjy döwletler 12-nji mejlisiň dowamynda Akademiýanyň täze agzasy hökmünde Türkmenistanyň mundan beýläkki hyzmatdaşlygynyň geljegi barada pikir alyşdylar.
ORIENT news
