Merkezi Aziýanyň ýaşlary Omsk şäherinde syýahatçylyk taslamalaryny tanyşdyrdylar
8 - 10-njy noýabrda Russiýa Federasiýasyndan, Gazagystandan, Gyrgyzystandan, Täjigistandan, Türkmenistandan we Özbegistandan 100- den gowrak wekil Omsk şäherinde geçirilen “Russiýa - Merkezi Aziýa sebiti” atly ýaş liderleriň forumyna gatnaşdylar. Düzümi esasan ýaşlardan ybarat bolan wekiliýet agzalary forumda syýahatçylygy ösdürmek bilen baglanyşykly 19 taslamany tanyşdyrdylar.
"TASS" habarlar agentliginiň Russiýanyň ýaşlar baradaky federal agentliginiň (Rosmolodýož) başlygynyň orunbasary Denis Aşirowyň sözlerine salgylanyp mälim etmegine görä, bu forum ýaşlar syýahatçylygyny ösdürmäge bagyşlandy.
Nygtalyşyna görä, ýaşlar syýahatçylygyny ösdürmek Russiýanyň ýaşlar syýasatynyň ileri tutulýan ugurlaryndan biridir. Şonuň üçin-de Gazagystanda, Gyrgyzystanda, Täjigistanda, Türkmenistanda we Özbegistanda ýaşlar pudagyndaky kärdeşler bilen hyzmatdaşlygy ösdürmek maksat edilýär.
Degişli forum Russiýanyň ýaşlar baradaky federal agentligi we Omsk sebitiniň dolandyryş edaralary tarapyndan guraldy. Forumyň çäklerinde dürli okuw sapaklary hem guraldy.
ORIENT news
