Arkadag şäherinde YHG-niň durnukly ösüş boýunça ministrler derejesindäki birinji forumy geçiriler
2024-nji ýylyň birinji çärýeginde Arkadag şäherinde Ykdysady Hyzmatdaşlyk Guramasynyň durnukly ösüş boýunça ministrler derejesindäki birinji forumy geçiriler. Bu barada Türkmenistanyň daşary işler ministri Raşid Meredowyň sözlerine salgylanyp, Döwlet habarlar agentligi mälim edýär.
Şeýle hem YHG bilen hyzmatdaşlygyň hukuk esaslaryny berkitmek üçin “Ykdysady Hyzmatdaşlyk Guramasynyň üstaşyr ulag gatnawlary boýunça Çarçuwaly ylalaşygyny” hem-de oňa degişli Teswirnamany tassyklamak boýunça degişli işleri amala aşyrmak teklip edilýär.
Türkmenistanyň Prezidenti Serdar Berdimuhamedowyň golaýda YHG-niň 16-njy sammitinde eden çykyşyndan ugur alnyp, serhetýaka söwda zolaklaryny döretmek we bu işe YHG-niň hünärmenlerini çekmek göz öňünde tutulýar.
Şeýle hem, anna güni geçirilen Hökümet mejlisinde döwlet Baştutanynyň garamagyna Türkmenistanyň halkara we sebit guramalarynda, hususan-da, YHG-da wekilçilik etmegine degişli teklip hödürlenildi.
ORIENT news
