Arkadag şäheriniň çägi ýene 120 gektar artar
Türkmenistanyň Mejlisi “Arkadag şäheriniň dolandyryş çägine üýtgetmeler girizmek hakynda” Karary kabul etdi. Oňa laýyklykda, Türkmenistanyň ilkinji "akylly" şäherine ýene 119 gektar ýer bölegi bölünip berler. Bu barada Türkmenistanyň Döwlet habarlar agentligi mälim edýär.
Şeýlelikde, Arkadag şäherini mundan beýläk-de ösdürmek maksady bilen, Ahal welaýatynyň Gökdepe etrabynyň 102 gektar hem-de Aşgabat şäheriniň 17 gektar ýeri täze şähere bölünip berler. Degişli Karar Arkadag şäherinde şäher hojalygyny mundan beýläk-de ösdürmek, guramaçylyk, dolandyryş babatda amatly şertleri döretmek maksady bilen, şeýle hem Arkadag şäheriniň häkimliginiň towakganamasyny göz öňünde tutulyp kabul edildi.
Türkmenistanyň Oba hojalyk ministrligine Arkadag şäheriniň häkimligi bilen bilelikde Arkadag şäheriniň dolandyryş çäkleriniň ýazgysyny bellenen tertipde geçirmek tabşyryldy.
ORIENT news
