Adamlara psihiki goldaw bermek boýunça okuw sapagy geçirildi
6-10-njy noýabrda Aşgabatda akyl saglygy we psihososial goldaw boýunça tälimçiler üçin bäş günlük okuw geçirildi. Çärä jemgyýetçilik, polisiýa işgärleri, mugallymlar, raýat jemgyýeti guramalarynyň wekilleri, öňdebaryjy ýaşlar gatnaşdylar.
Okuwlar BMG-niň Ösüş maksatnamasynyň halkara hünärmeni Witaliý Klimçuk tarapyndan geçirildi. Bu okuwlar adamlara psihiki goldawlary bermek boýunça işleri ösdürmegi, bu ugurdaky tejribeleri artdyrmagy maksat edinýär.
Okuwlara gatnaşyjylar ýaşlar we zenanlaryň arasynda negatiw psihiki täsirlere getirýän hadysalary derňäp, jemgyýetiň goldawa mätäç agzalaryna ýardam bermek hem-de munuň üçin geçirilmeli çäreleri giňişleýin maslahatlaşdylar.
Okuwlar BMG-niň Ösüş maksatnamasynyň "Öňüni alyş çäreleri hökmünde jemgyýet derejesinde ejiz ýaşlara we aýallara psihososial goldaw pudagynda milli mümkinçilikleri artdyrmak” taslamasynyň çäklerinde guraldy.
ORIENT news
