Türkmenistanyň Döwlet lukmançylyk uniwersitetinde biologiýa boýunça internet olimpiadasy geçiriler
Myrat Garryýew adyndaky Türkmenistanyň Döwlet lukmançylyk uniwersiteti 6-njy dekabrda biologiýa dersi boýunça 2-nji halkara internet olimpiadasyny guraýar. Oňa gatnaşmaga Türkmenistanyň we daşary ýurtlaryň talyp ýaşlary çagyrylýar.
“Biz bu internet olimpiadasynyň dürli ýurtlardaky ýokary okuw mekdepleriniň talyplary we mugallymlary bilen dostlukly gatnaşyklary berkitmäge ýardam etjekdigine, şeýle hem ylmy maglumatlaryň özara peýdaly alyş-çalşygyny we häzirki zaman ylmynyň nazary we amaly meselelerini öwrenmäge mümkinçilik berjekdigine ynanýarys. " diýlip, habarda bellenýär.
Halkara ders internet olipiadasy barada doly maglumaty uniwersitetiň resmi web-saýtyndan alyp bilersiňiz. Oňa gatnaşmak isleýänler 30-njy noýabra çenli özlerine bellige aldyrmalydyr.
Geçen ýyl biologiýa dersi boýunça geçirilen ilkinji halkara internet olimpiadasyna 19 ýurtdan bolan 34 ýokary okuw mekdebiniň, şeýle hem Türkmenistanyň 14 ýokary okuw mekdebiniň talyp ýaşlary gatnaşdylar. Şonda toparlaýyn ýaryşda birinji orna Myrat Garryýew adyndaky Türkmenistanyň Döwlet lukmaçylyk uniwersiteti, ikinji orna Russiýa Federasiýasynyň Astrahan Döwlet lukmançylyk uniwersiteti, üçünji - Türkmen oba hojalyk instituty mynasyp bolupdy.
Habarlaşmak üçin telefon belgileri: +993-12-48-99-32, +993-63-58-51-11.
ORIENT news
