BSG-niň we HPG-niň wekilleri türkmen talyplaryna sapak berdiler
Bütindünýä Söwda Guramasynyň goşulyşmak bölüminiň hünärmenleri Anastasiýa Smirnowa we Anna Warýanik türkmen talyplaryna sapaklary geçip, bu guramanyň düzümi, taryhy, esasy ýörelgeleri, Türkmenistan bilen hyzmatdaşlyk ugurlary barada giňişleýin gürrüň berdiler. Bu barada Türkmenistanyň resmi metbugat mälim edýär.
Şunuň bilen bir hatarda Halkara Pul Gaznasynyň wekilleri hem sebit ykdysady ösüşine bagyşlap sapak geçdiler. Hyzmatdaşlyk üçin esasy ugurlaryň hatarynda salgyt-býujet we pul-karz syýasaty, hem-de bilime we innowasiýalara maýa goýmak ugurlary görkezildi.
Bu okuw sapaklaryna Türkmen döwlet ykdysadyýet we dolandyryş institutynyň, Halkara gatnaşyklary institutynyň, Halkara ynsanperwer ylymlary we ösüş uniwersitetiniň, Türkmen döwlet maliýe institutynyň talyp ýaşlary, şeýle hem ýurduň Maliýe we ykdysadyýet ministrliginiň hem-de Merkezi Bankyň hünärmenleri gatnaşdylar.
Häzirki döwürde Türkmenistan Bütindünýä Söwda Guramasynyň doly agzasy bolmak we dünýä döwletleri bilen ykdysady gatnaşyklary ýeňilleşdirmek üçin çäreleri durmuşa geçirýär.
ORIENT news
