Türkmen hünärmenleri gymmatly kagyzlar bazarynda bilimlerini ýokarlandyrýarlar
Sişenbe güni Aşgabatda geçirilen okuw maslahatynda ÝHHG-e agza döwletleriň maliýe bazaryny netijeli dolandyrmak we ösdürmek babatda öňdebaryjy tejribeleri hem-de halkara standartlary öwrenildi.
Utgaşykly görnüşde geçen okuw seminaryna Maliýe we ykdysadyýet ministrliginiň, Merkezi bankyň we Aşgabat gazna biržasynyň wekiller we beýleki gyzyklanma bildiren adamlar gatnaşdylar. Halkara bilermenler gymmatly kagyzlar bazaryny ösdürmäge, elektron birža söwdalaryny herekete getirmegiň we guramagyň tertibi barada giňişleýin durup geçdiler.
ÝHHG tarapyndan guralan okuw seminarynda gymmatly kagyzlar bazarynda esasy gatnaşyjylar, olaryň broker, bellige alyş, karz beriji, birža we dolandyryş işleriniň çäklerindäki özara gatnaşyklaryna aýratyn üns berildi. Bilermenler wirtual aktiwler we olar bilen döreýän jenaýatçylyk töwekgelçilikleri bilen hem gatnaşyjylary tanyşdyrdylar.
ÝHHG-niň Aşgabatdaky merkeziniň ykdysadyýet we ekologiýa bölüminiň başlygynyň wezipesini ýerine ýetiriji Uilýam Lif Merkeziň bu ugurlarda konsultatiw we tehniki kömekleri Türkmenistana hödürlemäge taýýardygyny nygtady.
Şu ýylyň başynda ÝHHG-niň merkezi maliýe bazaryny ösdürmek boýunça onlaýn okuw maslahaty we bu ugurda gazanylan tejribeler bilen tanyşmak üçin Özbegistana sapar gurady. Saparyň dowamynda Aşgabat gazna biržasynyň wekilleri daşkentli kärdeşleriniň toplan tejribelerini ýerinde öwrendiler.
ORIENT news
