Türkmenistanyň Daşary işler ministrliginde “Nippon” gaznasynyň ýolbaşçylary bilen duşuşyk geçirildi
Sişenbe güni, 7-nji noýabrda Aşgabada sapar bilen gelen “Nippon” gaznasynyň ýerine ýetiriji direktory Ýuji Mori, Türkmenistanyň Daşary işler ministrligine bardy we daşary işler ministriniň orunbasary Mähri Bäşimowa bilen duşuşdy.
Olar söhbetdeşligiň dowamynda iki ýurduň arasyndaky netijeli hyzmatdaşlygy esasan hem, Türkmenistanyň ykdysadyýetiniň dürli pudaklarynda öňdebaryjy ýapon kompaniýalarynyň öndürijilikli işini bellediler şeýle hem, özara gatnaşyklary giňeltmek barada pikir alyşdylar. Bu nukdaýnazardan, JACAFA, NipCA, Read Japan ýaly “Nippon Foundation”-niň taslamalary barada hem aýdyp geçdiler.
Ýaşlar syýasaty pudagynda taslamalaryň we maksatnamalaryň durmuşa geçirilmegine aýratyn üns berildi. Söhbetdeşler bilim, ylym, saglygy goraýyş, sport we syýahatçylyk ugurlarynda täsirli özara gatnaşyklaryň hem ösüşiniň geljegini ara alyp maslahatlaşdylar.
Geçen bir ýylda, “Read Japan” taslamasynyň çäginde Nippon gaznasynyň Türkmenistanyň uniwersitetlerine we döwlet kitaphanasyna Ýaponiýa baradaky 200-den gowrak kitaplary sowgat edendigini bellemek möhümdir, bu bolsa, bilim we medeniýet ugurlaryndaky hyzmatdaşlygyň esasy görkezijisi bolup durýar.
ORIENT news
