Türkmenistanyň energetika toplumynyň wekilleri metan zyňyndylaryny azaltmak boýunça okuw geçdiler
Türkmenistanyň Döwlet energetika institutynyň, “Türkmengaz” we “Türkmennebit” döwlet konsernleriniň wekilleri ÝHHG tarapyndan guralan metan zyňyndylaryna gözegçilik etmek, bu ugurda barlaglary geçirmek we onuň derejesini azaltmak boýunça okuw maslahatyna gatnaşdylar.
6-7-nji noýabrda sanly ulgam arkaly geçirilen okuw maslahatda metan zyňyndylarynyň möçberini kesgitlemek we oňa gözegçilik etmek boýunça ÝHHG-a gatnaşyjy ýurtlaryň öňdebaryjy tejribeleri tanyşdyryldy. ÝHHG-niň Türkmenistandaky merkeziniň ykdysadyýet we ekologiýa bölüminiň başlygy Uliýam Lifiň bellemegine görä, Merkez Türkmenistanyň Ählumumy metan borçnamasyna goşulmak meselelerini öwrenmek we ekologiýa babatda halkara hyzmatdaşlygyny ösdürmek üçin bu okuw maslahaty guraldy.
Halkara bilermenler metan zyňyndylaryny azaltmagyň netijeleri we onuň mümkinçiliklerine baha bermek hem-de dolandyrmak babatda tehnologiýa ugurlary barada giňişleýin durup geçdiler. Metan zyňyndylarynyň möçberini kesgitlemek, gözegçilik etmek boýunça pikir alyşmalar guraldy.
ORIENT news
