ABŞ-nyň Döwlet sekretarynyň Günorta we Merkezi Aziýa meseleleri boýunça kömekçisi Astana we Daşkende sapar eder
ABŞ-nyň Döwlet sekretarynyň Günorta we Merkezi Aziýa meseleleri boýunça kömekçisi Donald Lu 4-11-nji noýabrda Gazagystana, Özbegistana we Hindistana sapar eder. Ol, sentýabr aýynda BMG-nyň Baş Assambleýasynyň çäginde geçirilen ilkinji C5+1 Prezident sammitiniň we oktýabr aýynda sebit gatnaşyklary boýunça C5+1 ministrler duşuşygynyň üstünlügini berkitmek üçin Merkezi Aziýada ABŞ- nyň wekiliýetine ýolbaşçylyk eder. Soňra, Döwlet sekretarynyň kömekçisi Lu ABŞ-Hindistan 2+2 ministrler dialogyny taýýarlamak we goldamak üçin Hindistana barar.
Döwlet sekretarynyň kömekçisi Lu Astanada bolup, Gazagystanyň ýokary derejeli hökümet işgärleri bilen duşuşar we ABŞ-nyň we Gazagystanyň giňeldilen strategiki hyzmatdaşlygy dialogyna gatnaşar.
Amerikanyň Birleşen Ştatlary we Gazagystan özara gyzyklanýan birnäçe meseläni, şol sanda syýasy we howpsuzlyk hyzmatdaşlygy, ykdysady hyzmatdaşlyk, adam hukuklaryny goramak we adamlar bilen gatnaşyklary ara alyp maslahatlaşar. Şeýle hem, aýal-gyzlaryň hukuklaryny we mümkinçiliklerini ýokarlandyrmak we metbugat erkinligi üçin raýat jemgyýetiniň wekilleri bilen duşuşar diýip, Döwlet departamentiniň metbugat beýanatynda aýtdy.
Döwlet sekretarynyň kömekçisi Lu ABŞ-Özbegistan strategiki hyzmatdaşlygy dialogynda ABŞ-nyň wekiliýetine ýolbaşçylyk etmek üçin Daşkende gider. Lu Özbek hökümetiniň ýokary derejeli işgärleri bilen duşuşyp, ABŞ bilen Özbegistanyň howpsuzlyk hyzmatdaşlygyny giňeltmek we sebitdäki meseleleriň çözgütlerini ara alyp maslahatlaşmak, adamlar bilen gatnaşyklary berkitmek we söwda we maýa goýumlaryny diwersifikasiýa etmek arkaly ikitaraplaýyn gatnaşyklary ösdürmegiň ýollaryny ara alyp maslahatlaşar. Şeýle hem, adam hukuklary meseleleri boýunça işleýän raýat jemgyýeti toparlary bilen hyzmatdaşlyk eder.
ABŞ-nyň wekiliýeti Gazagystanda we Özbegistanda bolup, Amerikanyň Birleşen Ştatlarynyň Merkezi Aziýa ýurtlarynyň özygtyýarlylygyna, territorial bitewiligine we garaşsyzlygyna üýtgewsiz ygrarlydygyny tassyklar diýip habarda bellenýär.
Şeýle wezipe bilen Donald Lu 2022-nji ýylyň noýabr aýynda Aşgabat şäherine bardy. Türkmenistana eden saparynda ABŞ-nyň Döwlet sekretarynyň kömekçisi Prezidentimiz Serdar Berdimuhamedow tarapyndan kabul edildi.
ORIENT news
