Türkmenistanyň Prezidenti täze athana baryp gördi we bag ekilşik dabarasyna gatnaşdy
4-nji noýabrda Türkmenistanda ählihalk bag ekmek çäreleri geçirildi. Oňa Prezident Serdar Berdimuhamedow hem gatnaşdy.
Köpçülikleýin bag ekişlik dabarasyndan öň, Türkmenistanyň Prezidenti Köpetdagyň eteginde täze gurlup tamamlanan athana toplumyna baryp, bu ýerde döredilen mümkinçilikler bilen ýerinde tanyş boldy. Bu toplumda 600 baş bedewi saklamak üçin ähli şertler göz öňünde tutulypdyr.
Wise-premýer Taňryguly Atahallyýew bu ýerde ýerine ýetirilen işler barada Türkmenistanyň Prezidentine hasabat berdi. Jemi 15,4 gektar çäkde ýerleşýän toplumda edara ediş merkezi, weterinar bejeriş nokady, 40 sany taý üçin ýatakhana, her biri 60 sany tohum ene at üçin 2 sany ýatakhana, her biri 88 ata niýetlenen ýatakhanalaryň 5-si, şeýle hem atlary idetmek, türgenleşik we gezim etdirmek üçin ýerler göz öňünde tutulypdyr.
Halkara Ahalteke atçylyk assosiasiýasynyň we Halkara Türkmen alabaý itleri assosiasiýasynyň wise-prezidenti, "Türkmenatlary" döwlet birleşiginiň direktory, Aba Annaýew adyndaky Halkara atçylyk akademiýasynyň rektory bu ýerde ahalteke atlaryny ösdürmek üçin guramaçylyk işleriniň guralyşy barada hasabatlar berdiler.
Duşuşygyň ahyrynda Serdar Berdimuhamedow täze atçylyk toplumyny noýabr aýynyň ikinji ýekşenbesinde bellenýän Hasyl toýuna gabatlap, dabaraly açmagy tabşyrdy.
Soňra Türkmenistanyň Prezidenti Serdar Berdimuhamedow Arkadag şäherine gelip, bu ýerde geçirilýän köpçülikleýin bag ekişlik dabarasyna gatnaşdy. Döwlet Baştutanyny Hökümet agzalary, ministrlikleri we pudaklaýyn dolabdyryş edaralaryň, jemgyýetçilik guramalary, diplomatik wekilhanalaryň ýolbaşçylary garşyladylar.
Türkmenistanyň Prezidenti ilkinji bag nahalyny oturdyp, bag ekişlik möwsümine badalga berýär. Döwlet Baştutanynyň göreldesine eýerip, ähli çärä gatnaşyjylar bag nahallaryny oturtmaga girişýärler. Bag ekmek bilen bir hatarda, ozal ekilen baglara ideg işleri hem geçirildi.
Diňe bir günüň içinde 472 müň düýp saýaly we miweli baglar oturdylyp, 1 million 868 müňden gowrak düýp baga hem ideg işleri geçirildi.
ORIENT news
