Soňky 10 ýylda Hazar deňziniň gyzgynlyk derejesi ýokarlandy
Baku şäherinde Hazaryň deňiz derejesini we üýtgeşmelerini öwrenmek hem-de uýgunlaşmak boýunça hazarýaka döwletleriniň bilermenleriniň mejlisi geçirildi.
Oňa hazarýaka döwletleriniň ekologiýa ministrlikleriniň, gidrometreologiýa gulluklarynyň we beýleki pudaklaýyn dolandyryş edaralarynyň, halkara guramalarynyň wekilleriniň hem-de bilermenleriniň 50-den gowragy gatnaşdy. Duşuşykda Hazar deňziniň suw derejesine täsir edýän meseleler boýunça ara alyp maslahatlaşmalar boldy.
Duşuşyga gatnaşyjylar Hazar deňziniň suw derejesine täsir edýän işlere we hadysalara gözegçilik etmek we gidrometreologiýa bahasyny bermek boýunça işleriň meýilnamasyny, şeýle hem deňziň howasynyň we derejesiniň üýtgemegi bilen bagly hadysalary bilelikde işläp taýýarlamak we uýgunlaşmak boýunça ylalaşdylar. Gatnaşyjylar Hazar deňziniň ekologiýa täsirlerine uýgunlaşmak çärelerini durmuşa geçimregi ylalaşdylar.
Bellenişi ýaly, soňky 10 ýylda Hazar deňziniň suwunyň gyzgynlyk derejesiniň ýokarlanýandygy hasaba alynýar. Şunuň bilen baglylykda, deňiz suwundaky iň ýokary gyzgynlyk 2021-nji ýylda Hazar deňziniň günorta böleginde hasaba alyndy. 2011-nji ýyldaky görkeziji bilen deňeşireniňde, deňiz suwunyň gyzgynlygynda uly tapawut göze ilýär. Bu barada Azerbaýjanyň Ekologiýa we tebigy serişdeler ministrliginiň degişli edarasynyň müdiri Elçin Mamedow mälim etdi.
Hazar deňzi boýunça bilermenler topary 2022-nji ýylyň iýunynda Aşgabatda geçirilen Hazarýaka döwletleriniň Baştutanlarynyň 6-njy sammitiniň jemleri boýunça döredildi.
ORIENT news
