Türkmenistan rus dili ýörgünli ulanylýan ýurtlaryň biri boldy
A.S.Puşkin adyndaky Döwlet rus dili institutynyň halkara bilim we dil syýasaty merkezi geçirilen barlaglaryň netijesinde "Dünýäde rus diliniň ýagdaýynyň görkezijileri" atly makalany çap etdi. Onda GDA agza ýurtlarda rus diliniň ulanyş derejesi boýunça ýagdaýlara syn berilýär.
Geçirilen barlaglaryň netijelerine laýyklykda, Türkmenistan rus diliniň medeni ulgamda ulanylyş derejesi boýunça GDA agza döwletleriň içinde öňdäki orny eýeleýär. Bellenişi ýaly, Türkmenistanyň kitaphana, teatr we muzeý işlerinde rus diliniň giňden ulanylmagy rus medeniýetini ýaýratmakda möhüm orny eýeleýär.
Türkmenistan ylmy aragatnaşyk ugrunda rus diliniň ulanylyş derejesi boýunça oňyn görkezijä eýe boldy. Nygtalyşy ýaly, türkmen alymlary özleriniň ylmy işlerini 3 dilde, türkmen, rus we iňlis dillerinde çap etdirýärler.
Häzirki wagtda ýurtda rus diline ýöriteleşen synplary bolan mekdepleriň 70-den gowragy hereket edýär. Bellenişine görä, ähli bilim merkezlerinde, mekdeplerde, ýokayr okuw mekdeplerinde rus dili öwenmek üçin hökmany bolan daşary ýurt dilleriniň biri bolup durýar.
ORIENT news
