“Arçman” şypahanasynda 400 orunlyk täze binalar toplumy gurlar
Türkmenistanyň Prezidenti Serdar Berdimuhamedowyň gol çeken Karary esasynda, Saglygy goraýyş we derman senagaty ministrligine Ahal welaýatynyň Bäherden etrabyndaky “Arçman” şypahanasynda taslamalary düzmek we gurmak üçin “Nahal” hojalyk jemgyýeti bilen şertnama baglaşmaga ygtyýar berildi. Bu barada Türkmenistanyň resmi metbugaty şenbe güni habar berdi.
Degişli Karar bar bolan mineral suwlaryň, şypahana bejerişiniň dürli ugurlaryny ylmy esasda öwrenip, olaryň mümkinçiliklerinden netijeli peýdalanmak boýunça giň gerimli işleri amala aşyrmak maksady bilen kabul edilip, oňa laýyklykda goşmaça täze 400 orunlyk bejeriş merkeziniň binalar toplumynyň taslamasy düzülip, döwrebap enjamlar bilen üpjün ediler we onuň ýanaşyk ýerleri abadanlaşdyrylyp gurlar. Şeýle hem, “Nahal” hojalyk jemgyýeti şypahanada ozal bar bolan “A” we “B” binalaryň durkuny täzelemek işlerini amala aşyrar.
Şertnamada binalar toplumy üçin elektrik, aragatnaşyk, gaz, suw üpjünçiliginiň we lagymyň meýdançadan daşarky eltiji inženerçilik ulgamlarynyň hem-de desgalarynyň durkuny täzelemek ýa-da täzelerini gurmak, olary umumyşäher ulgamyna birikdirmek işlerini ýerine ýetirmek göz öňünde tutulandyr.
Resminama laýyklykda, gurluşyk işlerine 2023-nji ýylyň noýabr aýynda başlamak we binalar toplumyny 2026-njy ýylyň oktýabr aýynda ulanmaga doly taýýar edip tabşyrmak bellenildi.
ORIENT news
