Prezident Serdar Berdimuhamedow Özbegistanyň daşary işler ministrini kabul etdi
Türkmenistanyň Prezidenti Serdar Berdimuhamedow Özbegistanyň daşary işler ministri Bahtiýor Saidowy kabul etdi. Diplomat Özbegistan Respublikasynyň Prezidenti Şawkat Mirziýoýewiň döwlet Daştutanyna mähirli salamyny ähli türkmen halkyna bolsa, parahatçylyk, abadançylyk we rowaçlyk baradaky arzuwlaryny ýetirdi.
Serdar Berdimuhamedow Özbek Lideriniň ýollan mähirli salamyna minnetdarlyk bilen jogap berip, Türkmenistanyň Özbegistan bilen ynamly, hoşniýetli gatnaşyklara hemişe ygrarlydygyny aýtdy. Bellenilişi ýaly, iki ýurduň hem sebitleýin we global meseleler boýunça, esasan hem bütindünýäde parahatçylygy we howpsuzlygy üpjün etmek we Durnukly ösüş maksatlaryna ýetmek bilen baglanyşykly biri-birine ýakyn ýa-da meňzeş pozisiýalary bar.
Türkmen-özbek söwda-ykdysady gatnaşyklar hem işjeň ösdürilýär, özara söwda dolanyşygy artýar, ýangyç-energetika, ulag we logistika, oba hojalygy we beýleki pudaklarda özara gatnaşyklar üçin täze mümkinçilikler açylýar.
Gatnaşyklaryň däp bolan möhüm bölegi hökmünde, iki döwletiň halklarynyň mundan beýläk-de ýakynlaşmagy, köp asyrlyk dostlugy we goňşuçylyk gatnaşyklaryny pugtalandyrmak üçin köpri bolup durýan medeni, ylym, bilim ugurlaryndaky gepleşikler bolup galýar. Bu barada «Watan» habarlar gepleşiginiň agşamky sanynda bellendi.
ORIENT news
