Türkmenistanyň Prezidenti we Halk Maslahatynyň Başlygy Gazagystanyň Prezidentine gynanç bildirdi
Türkmenistanyň Prezidenti Serdar Berdimuhamedow Gazagystan Respublikasynyň Prezidenti Kasym-Žomart Tokaýewe Karaganda sebitindäki ýangyn heläkçiliginiň köp sanly adam pidasyna we şikes ýetmelere getirmegi zerarly çuňňur gynanç bildirdi.
Döwlet Baştutany Türkmenistanyň halkynyň we Hökümetiniň adyndan, şeýle hem hut öz adyndan bu agyr pursatda gurban bolanlaryň maşgalalaryna we ýakynlaryna duýgudaşlyk we goldaw beriji sözlerini ýetirdi, şeýle hem ejir çekenlere tiz wagtda sagalmaklaryny arzuw etdi. Bu barada TDH habar berýär.
Türkmen halkynyň Milli Lideri, Halk Maslahatynyň Başlygy Gurbanguly Berdimuhamedow hem Gazagystanyň Prezidentine gynanç hatyny iberdi.
TDH hatdaky: “Gazagystan Respublikasynyň Karaganda sebitindäki Kostenko käninde bolan ýangyn habaryny gaty gynanç bilen kabul etdim” diýen sözleri getirýär.
Türkmen halkynyň Milli Lideri bu kyn pursatda pida bolanlaryň maşgalalaryna we ýakynlaryna duýgudaşlyk we goldaw beriji sözlerini ýetirdi, ýaralananlaryň bolsa, tiz wagtda sagalmagyny arzuw etdi.
2023-nji ýylyň 29-njy oktýabrynda Gazagystanyň Karaganda oblastyndaky şahtada dörän ýangyn sebäpli gurban bolanlaryň hatyrasyna Milli matam güni geçirildi.
Milli matam gününde gynanç alamaty hökmünde döwlet we ýerli dolandyryş edaralarynyň şol sanda, daşary ýurt diplomatik wekilhanalarynyň binalarynda baýdaklar düşürilýär.
28-nji oktýabrda irden Karaganda sebitindäki Kostenko şahtasynda partlama hadysasy boldy. Gazagystanyň Adatdan daşary ýagdaýlar ministrliginiň habaryna görä, ýekşenbe güni irden magdan käninde gurban bolanlaryň sany 36 adama ýetdi. 10 sany magdançyny gözlemek işleri dowam edýär.
ORIENT news
