Gazagystan we Hytaý tebigy gazyň eksporty boýunça şertnamany uzaltdylar
Gazagystanyň esasy gaz kompaniýasy “Nasionalnaýa kompaniýa QazaqGaz” paýdarlar jemgyýeti Hytaýyň PetroChina nebitgaz kompaniýasy bilen tebigy gazyň eksporty boýunça 2023-2026-njy ýyllar üçin täze şertnama gol çekdi.
Uzaldylan şertnama laýyklykda, Gazagystandan Hytaýa her ýylda 10 milliard kubometre çenli gaz ugradylar.
“Häzirki wagtda “QazaqGaz” kompaniýasynyň HHR-a gazagystan gazyny ibermek boýunça eksport şertnamasy bar. Ozal möçberler ýylda 10 milliard kubometre çenrli mümkinçilik boýunça kesgitlenilýärdi diýip” Gazagystanyň energetika ministri Almasadam Satkaliýew habar berdi.
Gazagystanda tebigy gazyň gorlary 3,8 trillion kubometr möçberinde hasaplanylýar. Onuň esasy möçberleri dört iri känlerde--Karaçaganak, Tengiz, Kaşagan we Žanažol känlerinde jemlenendir.
“QazaqGaz” kompaniýasynyň çaklamalary boýunça 2030-njy ýyla çenli Gazagystanda tebigy gazyň sarp edilişi 40 milliard kubometre çenli ýeter. Geçen ýyl ýurtda gazyň sarp edilişi 21 milliard kubometre, onuň eksporty bolsa 5 milliard kubometre deň boldy.
Gazagystan gazyň çykarylýan möçberlerini artdyrsa hem boljak ýaly, ýöne ýurtdaky ähli iri nebitgaz taslamalary önümi paýlaşmak hakyndaky ylalaşygyň çäklerinde amala aşyrylýar we häkimiýet daşary ýurt kompaniýalaryna täsir edip bilmeýär. Içerki bazarda tebigy gaz üýtgemeýän bahalardan sarp edijilere ýerlenilýändigi üçin daşary ýurt kompaniýalaryna Gazagystanyň içinde tebigy gazy satmak bähbitsizdir. Ýer gatlagyna gaz goýbermek arkaly alnan nebiti halkara bazarynda satmak has bähbitli bolup durýar.
“Samruk-Kazyna” döwlet gaznasynyň maýa goýum kompaniýasy bolan “QazaqGaz” ýylda 267,8 milliard kubometr geçirijilik ukyby bolan 76 müň kilometr gaz geçirijileri, şol sanda 20 müň kilometr esasy gaz geçiriji turbalary işledýär.
ORIENT news
