Türkmenistanyň Prezidenti bank ulgamynyň işgärlerini gutlady
Türkmenistanyň Prezidenti Serdar Berdimuhamedow milli pul birligi bolan manadyň dolanyşyga girizilmeginiň 30 ýyllygy mynasybetli ýurduň halkyny we bank ulgamynyň işgärlerini gutlady. Bu barada Türkmenistanyň Döwlet habarlar agentligi mälim edýär.
"Bank ulgamyna sanly tehnologiýalary ornaşdyrmak arkaly has köp zähmeti talap edýän işler awtomatlaşdyrylyp, maliýe we ykdysadyýet ulgamynyň işiniň tizligi artdyrylýar, ýerine ýetirilýän hyzmatlaryň gerimi giňeldilýär, netijeliligi we hili ýokarlandyrylýar" diýlip, Serdar Berdimuhamedowyň Gutlagynda nygtalýar.
Türkmenistanyň Prezidenti şeýle hem, milli manadyň ykdysadyýetde dolanyşygynyň kämilleşmeginiň, tiz pul dolanyşygynyň bolmagy esasynda ykdysadyýetde täze önümçilikleriň sanynyň artýandygyny nygtady.
Bellenişi ýaly, durmuş-ykdysady taýdan ösdürmek, jemi içerki önümiň jan başyna düşýän möçberi babatda Türkmenistan dünýäde ýokary girdejili ýurtlaryň ortaça derejesine ýetdi. Bu bolsa ýurdumyzda amala aşyrylýan pul-karz, salgyt-býujet, nyrh emele getiriş, maýa goýum syýasatynyň netijeliliginiň aýdyň görkezijisidir. Bu ýetilen sepgitleri Halkara pul gaznasy, Bütindünýä banky we beýleki abraýly halkara guramalar tassyklaýarlar.
ORIENT news
