Mejlisiň Başlygy we azerbaýjan ilçisi hyzmatdaşlygyň geljegini maslahatlaşdylar
Türkmenistanyň Mejlisiniň Başlygy Dünýägözel Gulmanowa Azerbaýjan Respublikasynyň täze bellenen ilçisi Gismat Gozalow bilen geçiren duşuşygynda ikitaraplaýyn hyzmatdaşlygyň geljegi maslahatlaşyldy.
Türkmen parlamentiniň ýolbaşçysy iki ýurduň arasyndaky hyzmatdaşlygyň ösüşiň täze tapgyryna gadam basandygyny, muňa ýokary derejede geçirilen gepleşikleriň, soňky ýyllarda işjeň ösdürilýän strategik hyzmatdaşlygyň oňyn täsirini ýetirendigini belledi.
Dünýägözel Gulmanowa ýurtlaryň arasynda syýasy, ykdysady, ynsanperwer ulgamlarda özara gatnaşyklary, hususan-da parlamentara hyzmatdaşlygy mundan beýläk-de ösdürmegiň ähmiýetini nygtady.
Ilçi Gismat Gozalow Azerbaýjanyň we Türkmenistanyň arasyndaky strategik hyzmatdaşlygyň gazanylan derejesi dürli ugurlarda gatnaşyklar üçin täze gözýetimleri açýar diýip. news.day.az neşiri habar berýär.
Parlamentara gatnaşyklary barada aýdylanda, 2022-nji ýylyň dekabr aýynda Azerbaýjanyň Milli Mejlisiniň başlygy Sahiba Gafarowanyň Türkmenistana sapar bilen gelendigi, onuň çäklerinde iki ýurduň kanun çykaryjy edaralarynyň arasynda özara düşünişmek hakynda Ähtnamanyň baglaşylandygy bellendi.
Duşuşykda iki ýurduň arasynda strategik gatnaşyklary mundan beýläk-de ösdürmek maksady bilen Türkmenistanyň we Azerbaýjanyň parlamentleriniň arasyndaky netijeli gatnaşyklaryň dowam etdiriljekdigine, şol sanda parlamentara gatnaşyklary boýunça işçi toparlarynyň derejesinde hem ösdüriljekdigine ynam bildirildi.
ORIENT news
