Türkmen talyplary Türkiýe Respublikasynyň döredilmeginiň 100 ýyllygy mynasybetli geçirilen dabaralara gatnaşdylar
Her ýylyň 29-njy oktýabrynda türk halky özleriniň baş baýramyny – Respublika gününi belleýär. 1923-nji ýylyň şu gününde Türkiýe Respublika diýlip yglan edildi. Bu şanly sene mynasybetli Türkiýäniň özünde, goňşy we ýakyn hyzmatdaş döwletlerinde dürli baýramçylyk dabaralary geçirildi.
Türkiýäniň Samsun şähernde bilim alýan türkmen talyby “Ýaşyl Ýarymaý” haýyr-sahawat guramasynyň düzüminde meýletinçi bolup gatnaşyp, doganlyk ýurduň şanly senesi mynasybetl guralan çärelere ýardam etdi. Türkiýäniň Ondokuz Maýys uniwersitetiniň kompýuter inženerçiligi fakultetiniň birinji ýyl talyby Isgender Annamuhammedow baýramçylyk dabaralaryndan galan täsirleri “ORIENT” bilen paýlaşdy.
-Men beýleki ýüz meňlerçe gatnaşyjylar bilen Türkiýäniň 1919 metrlik baýdagyny götermäge gatnaşdym. Bu agzybir hereketde uly watançylyk we jebislik duýgusyny başdan geçirýärsiň. Doganlyk türkmen we türk halklarynyň özara ýakynlygyndan çen tutsaň, bu duýgy has-da güýçli duýulýar.
Türkmen talyby şeýle hem, yzygiderli ösdürilýän türkmen-türk gatnaşyklary, bu ýerdäki däp-dessurlar we aýratynlyklar barada gürrüň berdi. Isgender ýaly Türkiýede bilim alýan türkmenistanly talyplar başga-da köp bolup, olar iki ýurduň arasynda medeni-ynsanperwer gatnaşyklary ösdüriji wekiller bolup çykyş edýärler.
ORIENT news
