Ulag pudagy türkmen-türk hyzmatdaşlygynyň esasy ugurlarynyň biri diýlip atlandyryldy
Türkmenistanyň Prezidenti Serdar Berdimuhamedow türk hyzmatdaşlaryna bilelikdäki ulag we logistika merkezini döretmegi teklip etdi. Bu barada döwlet Baştutanymyz Ankarada türkmen-türk işewürlik forumynyň açylyşynda aýtdy.
Ulag we aragatnaşyk pudagyny hyzmatdaşlygyň esasy we geljegi uly ugurlaryndan biri hökmünde bellän Prezidentimiz, häzirki wagtda Türkmenistanyň ähli aragatnaşyk görnüşlerini birleşdirýän täze ulag infrastrukturasynyň giň gerimli gurluşyk işlerini alyp barýandygyny nygtady.
Serdar Berdimuhamedow bu ugurda iki ýurduň ulag edaralarynyň, birleşikleriniň we kompaniýalarynyň arasynda yzygiderli iş duşuşyklaryny geçirmegi teklip etdi.
Şol bir wagtyň özünde, ulag pudagynda özara gatnaşyklary güýçlendirmek, işleri utgaşdyrmak we sazlaşykly alyp barmak maksady bilen, döwlet ulag edaralarynyň hem-de hususy kompaniýalaryň gatnaşmaklarynda bilelikdäki ulag-logistika merkezini döretmegi maksadalaýyk hasaplaýarys diýip, Türkmenistanyň Prezidenti aýtdy.
ORIENT news
