Energetika Türkmenistan bilen Türkiýäniň arasyndaky hyzmatdaşlygyň möhüm ugry
Serdar Berdimuhamedow türkiýeli hyzmatdaşlary energetika pudagynda hyzmatdaşlyk etmäge çagyrdy. Bu teklip Türkmenistanyň Prezidentiniň gatnaşmagynda Ankarada geçirilen Türkmenistan - Türkiýe işewürlik forumynda eden çykyşynda öňe sürüldi.
Prezident Serdar Berdimuhamedowyň sözlerine görä, ikitaraplaýyn gatnaşyklarda energetika ulgamy giň orun tutýar. Bu ýerde gürrüň türkmen energiýa serişdeleriniň, hususan-da, elektrik energiýasynyň we tebigy gazyň Türkiýä iberilmegi barada barýar. Türkmenistan energiýa serişdelerini öndürýän, üstaşyr geçirýän we sarp edýän taraplaryň bähbitlerini deň derejede göz öňünde tutmak ýörelgesinden ugur alyp, türkiýeli hyzmatdaşlar bilen bu ugurda özara hereketlere açykdyr diýip, Serdar Berdimuhamedow nygtady.
Türkmenistanyň we Türkiýäniň Prezidentleriniň arasynda geçirilen duşuşykda türkmen tebigy gazynyň we elektrik energiýasynyň Hazar deňziniň üsti bilen Türkiýä iberilmeginiň meseleleri hem ara alnyp maslahatlaşyldy.
ORIENT news
