Wise-premýer Amannepesow Türkiýäniň bilim ministri bilen duşuşdy
Türkmenistanyň Prezidentiniň Türkiýä resmi saparynyň çäklerinde wise-premýer Nurmuhammet Amannepesow Türkiýäniň milli bilim ministri Eren Okten bilen duşuşdy.
Duşuşygyň barşynda taraplar iki ýurduň ýakyn hyzmatdaşlygynyň nyşany bolan Aşgabat şäherindäki Bilelikdäki türkmen-türk mekdebiniň işi barada maslahatlaşdylar. Türkmen talyplarynyň Türkiýede okamagynyň wajyplygy aýratyn nygtaldy diýip, Türkiýäniň bilim ministrligi habar berýär.
Türk ministriniň sözlerine görä, bu talyplar medeniýetiň ilçileri bolup, iki ýurduň ýaş nesilleriniň arasynda dost-doganlygy berkitmekde wajyp wezipäni ýerine ýetirýärler. Ýokary derejedäki şeýle duşuşyklar we hyzmatdaşlyk ugrundaky tagallalar täze mümkinçilikleriň giň toplumyny açýar.
Görkezilen myhmansöýerlik üçin hoşallyk bildiren wise-premýer Nurmuhammet Amannepesow umumy taryha we medeniýet esaslanýan doganlyk halklaryň özara hyzmatdaşlygynyň geljekde hem uly üstünliklere ýetiriljekdigine ynam bildirdi.
Amannepesow Tükiýede berilýän bilime, bu ýurtdaky ýokary okuw mekdeplerini tamamlan uçurymlaryň bilimlerine ýokary baha berdi.
Açyk çeşmeleriň berýän maglumatyna görä, Türkiýede türkmenistanly talyp ýaşlaryň 12 müňe golaýy bilim alýar.
ORIENT news
