Türkmenistan Bişkekde Hökümet Baştutanlarynyň birnäçe mejlislerine gatnaşýar
Türkmenistanyň Ministrler Kabinetiniň Başlygynyň ykdysadyýet, bank we maliýe toplumyna gözegçilik edýän orunbasary Hojamyrat Geldimyradow Bişkek şäherinde şu gün – 26-njy oktýabrda geçirilýän Şanhaý Hyzmatdaşlyk Guramasyna agza döwletleriň Hökümet Baştutanlarynyň Geňeşiniň nobatdaky mejlisine gatnaşýar. Bu barada Gyrgyz Respublikasynyň Ministrler Kabinetiniň metbugat gullugy habar berýär.
Mejlise Belarusyň, Eýranyň, Gazagystanyň, Hytaýyň, Mongoliýanyň, Russiýanyň, Täjigistanyň we Özbegistanyň Hökümet ýolbaşçylar, şeýle hem Hindistanyň we Pakistanyň daşary işler ministrleri gatnaşýarlar.
Şeýle hem, şu gün gyrgyz paýtagtynda GDA ýurtlarynyň Hökümet Baştutanlarynyň Geňeşiniň mejlisi we Ýewraziýa Hökümetara Geňeşiniň mejlisi geçirilýär. Şanhaý Hyzmatdaşlyk Guramasyna agza döwletleriň Hökümet Baştutanlary hem bu mejlislere gatnaşarlar.
Mälim edilişine görä, olarda gatnaşyjy ýurtlaryň arasynda hyzmatdaşlygy pugtalandyrmagyň möhüm meseleleri maslahatlaşylyp, söwda-ykdysady we medeni-ynsanperwer ulgamlar boýunça birnäçe resminamalara gol çekiler.
ORIENT news
