Mary welaýatynda durmuş maksatly birnäçe desga gurlar
Mary welaýat häkimligi Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça Oba milli maksatnamasynyň çäklerinde durmuş maksatly birnäçe desgalary gurmak boýunça bäsleşik yglan etdi. Bu barada “Türkmenistan” gazetinde çap edilen bilidirişde habar berilýär.
Şeýlelikde, Mary etrabynyň Saryýazy obasynda 160 orunlyk çagalar bagyny, Murgap etrabynda 500 orunlyk mekdep, Ýolöten şäherinde gije-gündizde 10 müň kub metr suwy arassalaýjy desgany, Türkmengala etrabynda 25 müň kub metrlik, Baýramaly etrabynda 50 müň kub metrlik, Oguz han ilatly çäginde 15 müň kub metrlik suw arassalaýjy desgalary gurmak göz öňünde tutulýar.
Üçdepe we Täze dünýä şäherçelerinde ýangyn howpsuzlygy gullugynyň, arçynlygyň edara binalary, 660 orunlyk mekdep, saglyk öýi gurlup, ýol, elektrik we inžeenrçilik ulgamlary döwrebaplaşdyrylar.
Döwrebap Garypata şäherçesinde ýangyn howpsuzlygy gullugynyň, arçynlygyň edara binalaryny, 720 orunlyk mekdep, 320 orunlyk çagalar bagyny, saglyk öýüni gurmak, ýaşaýyş-durmuşa ulgamlaryny döwrebaplaşdyrmak göz öňünde tutulýar.
Bäsleşige gatnaşmak üçin teklipler 1-nji noýabra çenli Mary şäheriniň Çärjew köçesiniň 12-nji jaýynda kabul edilýär.
Telefon belgileri: 8 (522) 6-06-21, 6-00-34.
ORIENT news
