Serdar Berdimuhamedow Hazarüsti gaz geçirijisini geljegi uly iri taslamalaryň hatarynda kesgitledi
Prezident Serdar Berdimuhamedow “Türkmenistanyň nebiti we gazy – 2023” (OGT-2023) halkara maslahatyna we sergisine gatnaşyjylara iberen Gutlagynda Hazarüsti gaz geçirijisiniň türkmen tebigy gazyny Ýewropa döwletlerine çykarmakda geljegi uly iri taslamalaryň hatarynda durýandygyny belledi.
Bellenişi ýaly, sebitiň iri taslamasy bolan Türkmenistan — Owganystan — Pakistan — Hindistan gaz geçirijisiniň gurluşygynda daşary ýurtly işewürlere hyzmatdaşlyk etmäge uly mümkinçilikler bardyr.
Türkmenistan tebigy gazy diňe bir eksport etmegiň mümkinçilikleri bilen çäklenmän, ony gaýtadan işlemäge hem uly ähmiýet berýär. Bu ugurda-da ýurdumyz özara bähbitli hyzmatdaşlyk üçin açykdyr.
Döwlet Baştutany şeýle hem halkara bazaryň türkmen tebigy gazyna bolan islegini kanagatlandyrmakda gory boýunça dünýäde öňdäki orunlaryň birini eýeleýän «Galkynyş» gaz känine aýratyn ornuň degişlidigini belledi.
Türkmenistanyň Daşary işler ministrligi Hazarüsti gaz geçirijisi barada garaýşyny mälim edip, ony durmuşa geçirmek üçin hiç-hili bökdençligiň göze ilmeýändigini nygtady.
ORIENT news
