Albukerkede Türkmenistanyň Medeniýet günleri başlandy
Aşgabadyň dogan şäheri bolan ABŞ-nyň Albukerke şäherinde 23-nji oktýabrda Türkmenistanyň Medeniýet günleri başlandy. Çäre görnükli türkmen şahyry we akyldary Magtymguly Pyragynyň dünýä inmeginiň 300 ýyllygy mynasybetli gurnaldy. Oňa Türkmenistanyň ylym, medeniýet we sungat işgärleriniň wekiliýeti gatnaşýar.
Medeniýet günleriniň çäginde ABŞ-daky Türkmenistanyň ilçihanasy we Nýu-Meksiko uniwersiteti Albukerke şäher häkimliginiň goldawy bilen döredijilik duşuşygyny geçirildi. Duşuşykda Magtymgulynyň eserleri türkmen dilinde, şeýle hem iňlis dilindäki terjimeleri okaldy.
Şeýle hem, çärä gatnaşyjylar Türkmenistan Ylymlar akademiýasynyň Magtymguly adyndaky dil, edebiýat we milli golýazmalar institutynyň we Aşgabat şäheriniň Medeniýet müdirliginiň Merkezleşdirilen kitaphanalar ulgamynyň wekilleriniň çykyşlary netijesinde beýik türkmen şahyrynyň we akyldarynyň ömri we döredijiligi barada giňişleýin maglumatlary aldylar.
Çäräniň dowamynda Amerikan tarapyndan şahyr we Nýu-Meksiko ştatynyň senatynyň agzasy William Boldwin Onil, Magtymguly Pyragynyň döredijiligine ýokary baha berdi we şeýle ajaýyp çärä gatnaşmak mümkinçiligi üçin minnetdarlyk bildirdi.
Türkmenistanyň Medeniýet günleriniň çäginde Türkmenistanyň wekiliýetiniň Nýu-Meksiko uniwersitetiniň prezidenti Garnett Stouks bilen duşuşygy hem boldy. Taraplar iki ýurduň uniwersitetleriniň arasynda hyzmatdaşlygy ösdürmegiň geljegini ara alyp maslahatlaşdylar.
Türkmen talyplary üçin onlaýn okuwy guramak, şeýle hem uniwersitet mugallymlarynyň ylym we bilim pudagynda tejribe alyşmak üçin Türkmenistana saparlary barada gürrüň edildi.
ORIENT news
