Iňlis dilinde dogry ýazmak boýunça Aşgabatda “Spelling Bee” atly bäsleşik geçirildi
“Central Asian Spelling Bee” maksatnamasynyň çäklerinde Aşgabatdaky Döwlet medeniýet merkeziniň Döwlet kitaphanasynda iňlis dilinde dogry ýazmak boýunça milli bäsleşik geçirildi. Oňa Türkmenistanyň ýokary okuw mekdepleriniň 20-sinden 70 töweregi talyp gatnaşdy.
Bu bäsleşik ABŞ-nyň Türkmenistandaky ilçihanasynyň ýurduň Bilim, daşary işler we medeniýet ministrlikleri bilen hyzmatdaşlyk etmeginde guraldy. Bu bäsleşik eýýäm 2-nji gezek geçirilýär. Ilkinji gezek ol 2022-nji ýylda geçirilipdi.
Şu gezekki bäsleşikde Magtymguly adyndaky Türkmen döwlet uniwersitetinden 2 talyp, Halkara ynsanperwer ylymlary we ösüş uniwersitetiniň hem-de Türkmen döwlet maliýe institutynyň hersinden hem 1 talyp ýeňiji boldy. Ýeňiji bolanlar şu ýyl Duşenbe şäherinde geçiriljek “Central Asian Spelling Bee” atly sebit bäsleşigine gatnaşarlar.
Geçen ýyl Daşkentde geçen sebit bäsleşiginde türkmenistanly 2 talyp sebit bäsleşiginde 1-nji we 2-nji orunlara mynasyp bolupdylar.
Milli derejede geçirilen bäsleşige gatnaşan ABŞ-nyň Türkmenistanyň ilçisiniň bellemegine görä, üýtgeşikligi bilen tapawutlanýan bu bäsleşige dünýäniň dürli ýurtlaryndan müňlerçe talyp ýaşlar gatnaşýarlar. Bu bäsleşik iňlis dili boýunça sowatlylyk derejesini anyklamak üçin-de amatly mümkinçilikdir.
ORIENT news
