"CNPC" Merkezi Aziýadan Hytaýa iberilýän gazyň möçberini artdyrmagy meýilleşdirýär
Hytaýyň Milli nebitgaz korporasiýasynyň (CNPC) "Bir guşak, bir ýol" başlangyjyna gatnaşýan sebit ýurtlarynda gazyp alan tebigy gazynyň möçberi 4-nji ýyl yzly-yzyna, şol sanda geçen ýylda 80 million metr tonnadan geçdi, onuň söwdasy bolsa, 250 million tonnadan geçýär.
Kompaniýa şeýle hem, Hytaý - Merkezi Aziýa gaz geçirijisiniň 4-nji şahasynyň gurulmagynyň bu möçberi mundan beýläk-de artdyrmaga mümkinçilik döretjekdigini belleýär diýip, "China Daily" habarlar agentligi habar berýär.
Kompaniýa Hytaý - Merkezi Aziýa gaz geçirijisiniň D şahasynyň gurluşygyny tizleşdirjekdigini hem mälim etdi. Ýylda 30 milliard kub metr tebigy gazy ibermäge mümkinçilik berjek nobatdaky gaz geçiriji şahasy Türkmenistanyň, Özbegistanyň, Täjigistanyň we Gyrgyzystanyň çäklerinde geçer. Häzirki bar bolan 3 gaz geçiriji şahasy ýylda 55 milliard kub metr gazy Hytaýa ibermäge ukyplydyr.
"CNPC" kompaniýasynyň mälim etmegine görä, geçen ýyl Merkezi Aziýa - Hytaý gaz geçirijisi arkaly jemi 42 milliard kub metr tebigy gaz akdyryldy. Bu gündelik 100 million kub metre deňdir. Işe girizilen ýylyndan, ýagny 2009-njy ýyldan 2022-nji ýyla çenli bu gaz geçiriji arkaly tebigy gazyň jemi 423 milliard kub metri Hytaýa iberildi. Iberilen tebigy gazyň agramly bölegini türkmen uglewodorod serişdesi düzýär.
ORIENT news
