Türkmenistan GDA-da ykdysady hyzmatdaşlygy güýçlendirmek meselesini ileri tutýar
«Ykdysadyýetde hyzmatdaşlygy işjeňleşdirmegi hyzmatdaşlygymyzyň ileri tutulýan ugry hasaplaýarys», - diýip GDA-nyň döwlet baştutanlarynyň Bişkekdäki sammitinde Türkmenistanyň Prezidenti Serdar Berdimuhamedow aýtdy.
Döwlet Baştutanymyz 2019-njy ýylda Aşgabatda, GDA döwletleriniň baştutanlar geňeşiniň mejlisinde, Türkmenistanyň başlangyjy bilen işlenip düzülen Arkalaşygyň agza döwletleriniň strategiki ykdysady hyzmatdaşlygy hakyndaky jarnamasyna gol çekilendigini we onuň soňra kabul edilen GDA-nyň 2030-njy ýyla çenli ykdysady ösüş strategiýasynyň esasy bolandygyny ýatlatdy.
Serdar Berdimuhamedow «Demirgazyk-Günorta» we «Gündogar-Günbatar» geçelgeleriniň ösüşinde energetika, ulag we aragatnaşyk böleklerini diwersifikasiýa etmek boýunça türkmen tarapyndan başlanan taslamalaryň Arkalaşygyň döwletleri üçin aktuallygyna ynam bildirdi.
Türkmenistanyň Baştutanynyň belleýşi ýaly, Aşgabat Hazar-Gara deňziniň ugry we Aziýa-Ýuwaş umman sebiti, Aýlag we Ýakyn Gündogar ýurtlary bilen logistika mümkinçilikleriniň we ulag aragatnaşygynyň ýokarlanmagyna uly üns berýär.
«Häzirki wagtda global ykdysady krizis we global ýangyç we energetika bazaryndaky durnuksyzlyk şertlerinde hyzmatdaşlygymyzyň maliýe bölegi barada çynlakaý pikirlenmegi zerur hasaplaýarys. Karz borçnamalary we özara hasaplaşyk meselelerine üns bermegi we olary çözmek boýunça ýörite geňeşmeleri geçirmegi teklip edýäris», - diýip Türkmenistanyň Baştutany nygtady.
ORIENT news
