Dürli ýurtlardan 45 alym Türkmenistanda geçirilen halkara tehnologiýa bäsleşiginiň ýeňijisi boldy
Aşgabatda, şu ýylyň mart aýynda Türkmenistanda başlanan «Ýokary tehnologiýalar we innowasiýa ösüşleri» atly halkara ylmy bäsleşigiň ýeňijileri yglan edildi. Oňa dünýäniň dürli künjeginden ýaş alymlar gatnaşyp, olaryň 45-si ýeňijileri boldy.
Bäsleşigiň netijelerini jemleme dabarasy sişenbe güni paýtagtyň Söwda-senagat palatasynda öz işine başlan «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergisiniň çäginde 10-njy oktýabrda geçirildi.
Azerbaýjandan, Belarusdan, Wýetnamdan, Gruziýadan, Gazagystandan, Hytaýdan, Malaýziýadan, Täjigistandan, Türkmenistandan, Türkiýeden we Özbegistandan ýaş alymlar, oýlap tapyjylar we hünärmenler iň talap edilýän ugurlarda öz taslamalaryny we ylmy ösüşlerini hödürlediler.
Bäsleşikde dürli ýurtlaryndan 45 taslamanyň awtorlary ýeňiji boldy. Orunlar aşakdaky görnüşde paýlandy:
• I ýer - 9 adam;
• II ýer - 14 adam;
• III ýer - 22 adam.
Iň ýokary münberde 9 ýeňijiniň arasynda ýurdumyzyň ýokary okuw mekdeplerine we ylmy institutlaryna wekilçilik edýän Türkmenistanly 6-synyň bardygyny bellemek ýakymly:
Sower Serdarow – Oguz han adyndaky Inžener-tehnologiýalar uniwersitetiniň Ekologiýa we daşky gurşawy dolandyrmak fakultetiniň 4-nji ýyl talyby;
Gülnar Öwezdurdyýewa - Oguz han adyndaky Inžener-tehnologiýalar uniwersitetiniň «Materiallary öwrenmek we täze materiallar tehnologiýasy» fakultetiniň 4-nji ýyl talyby;
Halmyrat Orunbaýew - Türkmenistan Ylymlar Akademiýasynyň Tehnologiýa merkeziniň Nanotehnologiýa barlaghanasynyň müdiri;
Jennet Ataýewa - Magtymguly adyndaky Türkmen döwlet uniwersitetiniň organiki himiýa kafedrasynyň mugallymy;
Aýjahan Welýanowa - S. Seýdi adyndaky Türkmen döwlet mugallymçylyk institutynyň biologiýa we okatmagyň usullary bölüminiň mugallymy;
Batyr Hançaýew - Türkmenistanyň döwlet energetika institutynyň hünärmeni;
Ýuýsýuan Kou - Sinszýan uniwersitetiniň Geljekki tehnologiýa mekdebiniň aspiranty;
Suhrob Ýusupow - Özbegistan Respublikasynyň Ylymlar akademiýasynyň umumy we organiki däl himiýa institutynyň 2-nji ýyl doktoranty;
Parwinaý Olimboýzoda - Täjigistan Tehnologiýa uniwersitetiniň Ylym we amaly bölüminiň tehniki ylymlaryň kandidaty, doktorant.
Bäsleşik Türkmenistanyň Ylymlar akademiýasy, Bilim ministrligi we Türkmenistanyň Magtymguly adyndaky Ýaşlar guramasynyň merkezi geňeşi tarapyndan gurnaldy.
ORIENT news
