Türkmen alabaýyna bagyşlanan halkara maslahat we sergi geçiriler
Wise-premýer Taňryguly Atahallyýew şu ýylyň oktýabr aýynyň soňky ýekşenbesine meýilleşdirilen Türkmen alabaýynyň baýramy mynasybetli guraljak çärelere görülýän taýýarlyk barada anna güni geçirilen Hökümet mejlisinde hasabat berdi.
Dabaralaryň çäklerinde “Ýylyň türkmen edermen alabaýy” atly halkara bäsleşigiň jemleýji tapgyryny, sergidir halkara ylmy maslahaty geçirmegiň göz öňünde tutulýandygy barada habar berildi. Mundan başga-da, “Türkmen alabaý itleri” assosiasiýasynyň III mejlisi geçiriler.
Prezident Serdar Berdimuhamedow hasabaty diňläp, ýurdumyzda türkmen alabaýlarynyň tohum arassalygyny gorap saklamak, baş sanyny artdyrmak we şan-şöhratyny dünýä ýaýmak boýunça netijeli işleriň alnyp barylýandygyny nygtap, bu baýramy ýokary derejede guramak üçin gowy taýýarlyk görmegi wise-premýere tabşyrdy.
Türkmen alabaýynyň baýramy Türkmenistanda döredilen iň täze baýramlaryň biridir. Ol ilkinji gezek 2021-nji ýylda Türkmen bedewiniň baýramy bilen bilelikde bellenipdi.
ORIENT news
