Owganystanyň Pekindäki wekili Hytaý bilen ykdysady gatnaşyklary çuňlaşdyrmaga ymtylýar
"Talibanyň" ýolbaşçylygyndaky owgan hökümetiniň resmi wekili Pekindäki ösüş meseleleri boýunça sammitiniň çäginde Hytaý bilen has çuňňur ykdysady hyzmatdaşlyga ymtylýandygyny çarşenbe güni Frans Press agentligine habar berdi.
Senagat we söwda ministri Noruddin Azizi: "Hytaý bilen maýa goýumlary we gowy ikitaraplaýyn gatnaşyklar barada gepleşik geçireris" diýip, belledi.
"Taliban" hökümeti hiç bir ýurt tarapyndan resmi taýdan ykrar edilmedi, ýöne Kabul Pekin bilen diplomatik gatnaşyklaryny dowam etdirýär, Azizi şu hepde "Bir guşak we bir ýol" söwda we infrastruktura taslamasynyň 10 ýyllygy mynasybetli geçirilýän sammite gatnaşmaga çagyryldy.
Azizi AFP habar gullugyna "Biz eýýäm Hytaý bilen köp sanly taslama gol çekdik" -diýdi.
Owganystan, mis we altyn ýaly tebigy gorlaryny göz öňünde tutup, “Bir guşak we bir ýol” başlangyjy üçin gymmatly mümkinçiliklerini hödürleýär.
"Taliban" hökümetiniň wekili Mes-Aýnak mis känlerini we Kaşkari nebit ýatagy ýaly käbir "megaproektleri" agzap geçdi.
Azizi: "Hytaý Owganystanyň ösüşi bilen beýleki ýurtlara garanyňda has köp gyzyklanýar". Ol Owganystanyň resmi agza hökmünde “Bir guşak we ýol” başlangyjyna goşulmagy baradaky gepleşikleriň dowam edýändigini hem aýdyp geçdi.
Azizi dag-magdan we oba hojalygyna ünsi çekip: "Owganystan uly mümkinçilikler hödürleýär" – diýip belledi. – Biz Hytaý bilen gatnaşyklarymyzdan hoşal".
ORIENT news
