«Euronews» teleýaýlymy «Türkmenaragatnaşyk» agentligi bilen hyzmatdaşlygyny giňelder
«Euronews» teleýaýlymynyň wekiliýeti iş sapary bilen Aşgabat şäherine geldi we duşenbe güni Türkmenistanyň Daşary işler ministrliginde ministriň orunbasary Mähri Bäşimowa bilen gepleşikler geçirdi.
Türkmen Daşary işler ministrliginiň metbugat gullugynyň habaryna görä, duşuşykda «Euronews»-a satuw we hyzmatdaşlyk boýunça wise-prezidenti Silwain Jan Iw Roje wekilçilik etdi. Taraplar soňky on ýylda ösen netijeli hyzmatdaşlygy bellediler we Türkmenistanda bolup geçen möhüm wakalary beýan etmek üçin üstünlikli durmuşa geçirilen birnäçe taslamany agzadylar.
Söhbetdeşler halkara maglumat giňişliginde uzak möhletli hyzmatdaşlygyň meýilnamalaryny hem ara alyp maslahatlaşdylar. Ýewropa teleýaýlymynyň wekilleri bilelikdäki çäreleri güýçlendirmäge we özara gatnaşyklaryň täze görnüşlerini ösdürmäge taýýardyklaryny mälim etdiler.
Şunuň bilen baglylykda, duşuşygyň netijelerine görä taraplaryň arasynda Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenaragatnaşyk» Agentligi bilen «Euronews» kompaniýasynyň gol çeken, hyzmatdaşlyk hakyndaky ylalaşygynyň ýerine ýetirişi barada pikir alyşma geçirildi.
ORIENT news
