Türkmenistanyň Halk Maslahatynyň Başlygynyň Hytaýa iş sapary başlandy
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow «Bir guşak, bir ýol» III ýokary derejeli foruma gatnaşmak üçin Pekine geldi.
Saparyň dowamynda Halk Maslahatynyň Başlygy Hytaýyň prezidenti Si Szinpin bilen hem gepleşikler geçirer diýip, TDH agentligi habar berýär.
Türkmen-hytaý özara gatnaşyklary iki ýurt tarapyndan gol çekilen Strategiki hyzmatdaşlyk gatnaşyklaryny ýola goýmak baradaky Bilelikdäki Jarnama laýyklykda doly gurulýar. Türkmenistanyň Prezidenti Serdar Berdimuhamedowyň Hytaýa eden döwlet saparyndan we şu ýylyň ýanwar aýynda Hytaýyň prezidenti Si Szinpin bilen geçirilen gepleşikleriniň netijesinde iki ýurduň arasyndaky gatnaşyklaryň derejesiniň hemmetaraplaýyn strategiki hyzmatdaşlyga çenli ýokarlandyryljakdygy barada aýdyldy diýip, habarda bellenýär.
«Bir guşak, bir ýol» Hytaý bilen Merkezi Aziýanyň, Ýewropanyň we Afrikanyň 60-dan gowrak ýurduny birleşdirýän bar bolan söwda we ulag geçelgelerini kämilleşdirmek we täzelerini döretmek boýunça halkara başlangyjy bolup, olaryň we Hytaýyň arasyndaky söwda gatnaşyklarynyň ösmegine kömek edýär.
ORIENT news
