Aşgabatda türkmen-italýan işewür forumy geçirildi
Aşgabatda Türkmenistanyň Söwda-senagat palatasynyň binasynda agro-senagat tehnikasy we enjamlary, azyk senagaty we gaplaýyş önümlerini öndürmek boýunça türkmen-italýan tehnologiki seminary geçirildi. Foruma ýerli telekeçiler, şeýle hem Türkmen paýtagtyna sapar bilen gelen Italiýa kompaniýalarynyň we Italian Trade Agency in Istanbul gullugynyň wekilleri gatnaşdy.
Italiýanyň işewürleriniň düzümi Rinieri, Vignetinox, Ricciarelli SPA, RI.MA Group, FBR-ELPO SPA, SARBA International we başgalar ýaly kompaniýalary öz içine alýar. Iki ýurduň işewür toparlarynyň duşuşygyny Italiýanyň Aşgabatdaky ilçihanasy Türkmenistanyň Söwda-senagat palatasy bilen bilelikde gurady.
Italiýanyň Türkmenistandaky ilçisi Luijio Ferrari ýygnananlara ýüzlenip, bu çäräniň italýan we türkmen telekeçileri üçin hyzmatdaşlyk platformasy boljakdygyny aýtdy. Telekeçiler öz kompaniýalarynyň çeşmelerinden we artykmaçlyklaryndan iň ýokary derejede peýdalanyp, tejribe alyşmaga, bilelikdäki taslamalary we maksatnamalary işläp taýýarlap bilerler.
Forumyň çäginde, Italiýanyň hususy pudagynyň wekilleri türkmen kärdeşleri bilen birnäçe ikitaraplaýyn duşuşyklary geçirdi.
ORIENT news
