Demir gapylary öndürýän türkmen kompaniýasy halkara bazara çykýar
Polady sowuk gaýtadan işlemek esasynda dürli önümleri öndürýän “Eýýam” hususy kärhanasy şu önümçilik çygrynda 10 ýyllyk tejribäniň eýesidir. Bu barada Türkmenistanyň Senagatçylar we telekeçiler birleşmesiniň web-saýtynda habar berilýär.
Metal şkafarynyň we gapylaryň, ammar gurşawlarynyň, lukmançylyk, bilim hem-de sport edaralary üçin stellaž ulgamlarynyň, şeýle hem howpsuzlyk we serwer şkaflarynyň önümçiligi kärhananyň işiniň möhüm ugurlarydyr.
Toz görnüşinde sepilýän boýag “Eýýamyň” önümleriniň göze gelüwliligini üpjün edýär. Şeýle boýaglaryň poladyň has-da mäkämligini gazanmaga ýardam edýändigine hem ünsi çekmek gerek. 10 ýyllyk tejribe kärhananyň işini has-da kämilleşdirmegine oňyn täsirini ýetirdi. “Eýýam” şol ýyllarda meşhur daşary ýurt kompaniýalarynyň birnäçesi bilen hyzmatdaşlyk etdi, iri taslamalaryň ençemesini durmuşa geçirdi.
Galyberse-de, kärhananyň müşderileriň ösen isleglerini çalt we ýokary hilli önümler bilen kanagatlandyrmak üçin mäkäm binýady bar. “Eýýamyň” interýeriň bezegi bilen ajaýyp sazlaşygy emele getirýän polat gapylary, howpsuzlyk we serwer şkafary örän berk hem-de uzak möhlete çydamlylygy, galyberse-de, özboluşly dizaýny bilen tapawutlanýar.
Kärhana häzirki wagtda önümlerini daşary döwletlere eksport etmek boýunça baglaşan şertnamalary bilen baglylykda, önümçiligini has-da giňeltmegi meýilleşdirýär. Şeýlelikde, “Eýýamyň” önümleri ýakyn günlerde Özbegistana hem-de Gazagystana eksport edilip başlanar.
ORIENT news
