Dürli ýurtlaryň adwokatlar kollegiýasy Aşgabatda adyl kazyýet işini maslahatlaşdylar
Merkezi Aziýa ýurtlarynyň, şeýle hem Ýewropa döwletleriniň birnäçesiniň, Türkiýäniň we Azerbaýjanyň adwokatlar kollegiýasynyň wekilleri halkara we Ýewropa hukuk ulgamynda kazylaryň eýeleýän ornuny, şeýle hem olaryň duş gelýän birnäçe kynçylyklaryny, aýratynlyklaryny, etiki kadalaryň ýerine ýetirilişiniň üpjün edilişi bilen bagly meseleleri maslahatlaşdylar.
Halkara maslahata şeýle hem Ýewropa Bileleşiginiň Türkmenistandaky ilçisi Beata Peksa hem gatnaşdy. Onuň belleýşi ýaly, bu çäre Merkezi Aziýada kanunyň hökmürowanlygyny üpjün etmek boýunça degişli maksatnamanyň çäklerinde geçirildi.
Ýewropa Bileleşiginiň diplomatynyň nygtaýşy ýaly, bu duşuşyk Türkmenistanyň ähli raýatlary üçin adalatly kazyýet ulgamyna bolan elýeterliligini üpjün etmekde bar bolan meseleleri, pikirleri we strategiýalary ara alyp maslahatlaşmak üçin bu ugurda işleýän işgärleriň, bilermenleriň we syýasatçylaryň bir ýere jemlenmegini üpjün etdi. Döwlet institutlary kanunyň we adam hukuklarynyň hökmürowanlygyny üpjün etmäge ýardam berip, ýurduň durnukly ösüşini, raýatlaryň howpsuzlygyny berkitmäge mümkinçilik döredýär.
ORIENT news
