Bütindünýä mirasynyň şäherler guramasynyň forumynda Köneürgenç şäheri hödürlendi
Aziýa-Ýuwaş ummany sebiti boýunça Bütindünýä mirasynyň şäherler guramasynyň dördünji sebit forumy 10-15-nji oktýabr aralygynda Günorta Koreýanyň Kýonji şäherinde geçirildi. Bu çärä Türkmenistanyň Medeniýet ministrliginiň wekiliýeti hem gatnaşdy.
Forumyň dowamynda türkmen tarapy arhitektura eserleri we ýadygärlikleri bilen ÝUNESKO-nyň Bütindünýä mirasynyň sanawyna girizilen gadymy Köneürgenç şäheriniň taryhy we medeni mirasy barada hasabat hödürlediler.
Türkmenistanyň Daşary işler ministrliginiň websaýtynda habar berlişine görä, Türkmenistanyň taryhy we häzirkizaman ösüşi we ýurduň syýahatçylyk mümkinçilikleri barada wideo görkezildi.
Sebitleýin konferensiýa, ÝUNESKO-nyň Bütindünýä mirasynyň sanawyna girizilen şäherleriň potensialyny ýokarlandyrmak üçin göze görnüp duran we maddy däl medeni mirasy ulanmak temasyna bagyşlandy.
ORIENT news
